لسلامتك!..أنظمة أمان في عربيتك لو بإيدك متستغناش عنها ..اتعرف عليها في المقال ده:
الدنيا بتتطور يوم بعد يوم في مستوى الأمان اللي بتقدمه صناعة السيارات. و احنا حاليا بنشهد ثورة في عالم السيارات من حيث الاهتمام بأمان السائق والركاب. تعالوا نشوف ايه آخر ما توصلوا إليه...
1- وسائد الهواء ( Air Bags ):
لا قدر الله في حالة
الاصطدام بتكون وسائ الهواء هي خط الحماية الأول بالتعاون مع حزام الأمان. اللي
بيحصل إن رسالة كهربية كيميائية بتحصل داخل البالونة بتعمل على توليد الغاز اللي
بيملأ الوسادة بالغاز بسرعة فائقة بحيث بدل ما الرأس تصطدم بالمقود أو التابلوه
تصطدم بالوسادة فتمتص قوة الصدمة قدر الإمكان و يطلع منها المعلم سليم بإذن الله
.. مهم جدًا يتم التشييك عليها كل فترة وعلى حساساتها عشان نتطمن انها هتكون
موجودة وقت الحاجة .. وربنا يسترها على الجميع.
2- نظام ABS (مانع انغلاق الفرامل):
و ده اللي بيمنع
الفرامل تقفش في العجل مرة واحدة وقت الضغط الشديد عليها ف حالة الطوارئ والسرعة
العالية. فايدته بتكون ف انها بتمنع العربية من انها نتحرف فجأة عن مسارها بسبب
الفرامل الشديدة على العجل مرة واحدة.
3- نظام ESC (الثبات الإلكتروني):
بيحافظ على توازن
العربية في المنعطفات الشديدة المفاجئة..مهم جدًا.
4- نظام TPMS (مراقبة ضغط الإطارات):
بيزودك دايمًا
بتنبيه لو حصل انخفاض في ضغط العجل..واللي بيحافظ على عمر الإطارات أطول فترة ممكنة
وبيحميك من السهو عن ضغط الإطارات واللي بيكون شيء غاية في الأهمية لو على طريق
سفر طويل أو لو رايح مكان الطرق المؤدية ليه بينقصها الخدمات.
5- نظام عين القفا BSM (مراقبة النقط العمياء):
رادارات بتكشف لقائد
المركبة ايه اللهو الخفي اللي بيحصل في النقط العمياء بالنسباله
ف بيكون على دراية
بكامل محيط السيارة و بتنهي مشكلة النقط العمياء والحوادث الغير متوقعة اللي
بتترتب عليها.
6- نظام بص قدامك (مانع التصادم BDS ):
بياخد باله معاك من
الحركة الفجائية اللي بتحصل قدامك زي واحد معدي فجأة قدامك..عربية فرملت
فجأة..تقوم المركبة مستجيبة للطارئة دي بفرملة أوتوماتيكية لتجنب الاصطدام..وده
قلل كم كبير جدًا من الحوادث اللي من النوع ده.
7- نظام AFS (الإضاءات الأمامية المتكيفة):
اسمها كدة عشان
بتتكيف مع الوضع الخارجي للسيارة من إضاءة وكمان اتجاه السير(أيوة الفوانيس بتلف
يمين وشمال)، اللي على أساسه بيتحكم في طريقة توزيع الإضاءة وكمان شدتها عشان
يديلك تجربة قيادة أسهل وأوضح في مختلف ظروف الإضاءة المحيطة سواء ليل أو نهار.
8- نظام LDWS (تحذير مغادرة المسار):
بيديلك تنبيه لو
أخدت قرار انك تنقل من حارة لحارة أو تاخد تيرن من غير ما تدي إشارة عن طريق تنبيه
أو هزة ف الدركسيون.
ولسة
ياما في الجراب يا حاوي، لكن بالرغم من كل ده..كل وسائل الأمان اللي في الدنيا مش
هتمنع الأحداث المؤسفة اللي بتقابلنا في شوارع المحروسة لو مبدأناش بنفسنا
واحترمنا الغير سواء راكب أو ماشي..وربنا يحمينا ويحمي الجميع.
